Mbi 15 filiale bankash të dëmtuara nga protestat; bankat: Depozitat janë të sigurta

Gjatë tri ditëve të protestave në Tiranë u dëmtuan mbi 15 filiale të bankave të nivelit të dytë, si dhe disa biznese të tjera. Punonjësit e sigurisë raportuan se sinjalizimet drejt Policisë nuk morën përgjigje dhe se ndërhynë vetëm kompanitë private të sigurisë.

Shoqata Shqiptare e Bankave sqaroi se dëmet janë vetëm materiale dhe nuk prekin fondet e depozituesve. Sipas saj, sistemi bankar është i shëndetshëm, i kapitalizuar mirë dhe nën mbikëqyrje.

Disa banka kanë mbyllur përkohësisht filiale ose kanë shkurtuar orarin. Shoqata këshillon klientët të ndjekin njoftimet zyrtare të bankës së tyre dhe të kryejnë pagesat e transfertat përmes bankingut digjital.

Bizneset kërkojnë mbrojtje më të mirë të pronës private dhe prani më të madhe të Policisë në zonat me aktivitet të lartë ekonomik.