Përplasje në Prishtinë: 11 protestues dhe 6 policë të lënduar, tre të shoqëruar

Një protestë në qendër të Prishtinës, e lidhur me vendimin e Dhomave të Specializuara për ish-drejtuesit e UÇK-së, përfundoi të hënën në mbrëmje me përplasje mes protestuesve dhe Policisë së Kosovës.

Sipas policisë, ndërhyrja nisi pasi protestuesit hodhën fishekzjarre, mjete piroteknike dhe sende të forta drejt godinave të Qeverisë dhe të Kuvendit. U përdorën gaz lotsjellës, sprej djegës dhe topi i ujit.

Policia raportoi se 11 qytetarë kërkuan ndihmë mjekësore dhe gjashtë zyrtarë u lënduan. Tre persona u shoqëruan në stacion. Disa rrugë rreth qendrës u mbyllën për qarkullim.

Në orët e vona situata u qetësua. Organizatorët u bënë thirrje pjesëmarrësve të largoheshin dhe të riktheheshin në shesh të nesërmen në mëngjes.