Pezullohet drejtuesja e AKU-së Durrës, masë edhe ndaj një inspektori kufitar

Drejtuesja e Autoritetit Kombëtar të Ushqimit në Durrës, Anila Kapedani, është pezulluar përkohësisht nga detyra, sipas informacioneve të siguruara nga supernews.al nga burime brenda institucionit.

Sipas këtyre burimeve, masa është marrë më 16 tetor, me urdhër të Drejtorisë së Përgjithshme të AKU-së. Arsyet konkrete dhe kohëzgjatja e pezullimit mbeten për t’u konfirmuar zyrtarisht.

Pezullimi i raportuar vjen pas përzgjedhjes së saj në krye të drejtorisë rajonale në muajin Gusht. Sipas materialit të përcjellë redaksisë mbi procedurën, Kapedani ishte kandidatja e vetme e kualifikuar për të vijuar konkurrimin.

Pezullim edhe në kontrollin kufitar.

Ndërkohë, kopja e një urdhri të vënë në dispozicion të supernews.al parashikon pezullimin e përkohshëm të L.B., inspektor veteriner në Sektorin e Kontrollit në Pikat e Inspektimit Kufitar të Drejtorisë Rajonale të AKU-së, Qarku Durrës.

Në dokument përcaktohet se pezullimi fillon më 16 tetor 2026 dhe vijon deri në një urdhër të dytë. Si pjesë e bazës së vendimmarrjes përmendet një memo e datës 14 tetor nga Sektori i Ankesave Administrative dhe Gjyqësore në Drejtorinë e Përgjithshme.

Në arsyetimin e masës përmendet nënshkrimi i Pjesës 2 të DVIT-it dhe lejimi i kalimit të një ngarkese. Urdhri përmban referenca te nenet 248 dhe 186, pika 3, të Kodit Penal, në lidhje me dyshimet dhe rezultatet e hetimit.

Dokumenti i paraqitur nuk jep hollësi mbi llojin e ngarkesës, sasinë, origjinën apo subjektin tregtar. Gjithashtu, nuk përcakton nëse ngarkesa paraqiste rrezik për sigurinë ushqimore.

Pezullimi përshkruhet si masë paraprake për mbrojtjen e interesit publik dhe integritetit të institucionit, si dhe për mundësimin e një hetimi të paanshëm e të pavarur. Gjatë kësaj periudhe, sipas urdhrit, inspektori nuk përfiton pagë.

Për produktet ushqimore që vijnë nga jashtë, kontrolli i origjinës, gjurmueshmërisë, afateve dhe kushteve të transportit duhet të jetë real dhe i dokumentuar. Çdo dobësi në këto hallka mund të rëndojë mbi konsumatorin. Në këtë rast nuk është provuar hyrja e produkteve të pasigurta në treg, por pikërisht për të shmangur dyshimet kërkohen përgjigje të qarta dhe kontrolle të besueshme.