Shporta e vendasve me makarona e oriz, ajo e turistëve me ushqime të gatshme

Turizmi po e ndryshon konsumin në supermarkete, por sipas tregtarëve nuk mjafton për të kompensuar rënien e kërkesës nga emigracioni. Te vendasit mbizotërojnë produktet bazë, ndërsa turistët blejnë ushqime të gatshme, snack-e dhe pije.

Në tetë muajt e parë të vitit u importuan rreth 14 milionë kg makarona, 7% më shumë se një vit më parë, dhe rreth 15.4 milionë kg oriz, me rritje 9%. Importet e grurit arritën 131 mijë tonë, ato të misrit rreth 89 mijë tonë, sasia më e madhe e dekadës, dhe ato të sheqerit 38 mijë tonë.

Hyrjet e të huajve vazhdojnë të rriten: rreth 7 milionë në shtatë muaj, me rritje 6.4%, dhe 1.9 milionë vetëm në korrik, rekord i dekadës. Shumë turistë blejnë në supermarkete dhe gatuajnë në apartamente, sidomos produkte të markave të huaja.

Vaji i lulediellit shitet këtë vit 170–190 lekë për litër, dhe konsumi i tij ka rënë 10–12% krahasuar me pesë vite më parë. Te detergjentët, konsumatorët po kalojnë te paketimet më të vogla dhe më të lira. Tregtarët e shohin zgjatjen e sezonit turistik si sfidën kryesore.