Spanja në alarm të kuq për stuhitë: Një viktimë në Katalonjë, ushtria në Balearë

Spanja është në gatishmëri të lartë për një valë të re stuhish, pas një fundjave me përmbytje që shkaktuan dëme të mëdha. Shërbimi meteorologjik i ka cilësuar fenomenet jashtëzakonisht të rrezikshme dhe ka shpallur alarm të kuq për Majorkën dhe Valencian.

Në Katalonjë, një grua u rrëmbye të shtunën nga rrjedha e një përroi të fryrë në Cabrera de Mar, rreth 25 km nga Barcelona. Trupi i saj u gjet të dielën. Ushtria është mobilizuar në Ishujt Balearik në ndihmë të shërbimeve të emergjencës.

Autoritetet rajonale mbyllën shkollat në Majorkë, Ibiza dhe Formentera dhe pezulluan hekurudhën në Valencia. Në Ibiza, rruga kryesore për në aeroport u mbyll pasi makinat mbetën nën ujë dhe baltë. Disa fluturime u anuluan dhe 16 u devijuan.

Në Almeria u kryen 37 operacione shpëtimi brenda dy ditësh, ndërsa pranë Malagas zjarrfikësit nxorën dhjetë persona të bllokuar në një tunel të përmbytur.