Rezerva e sigurisë për naftën: Operatorët parashikojnë +6.1 lekë për litër te pompa

Kompanitë që importojnë dhe tregtojnë karburante llogarisin se krijimi i rezervës kombëtare të sigurisë do ta rrisë çmimin në pompë me rreth 6.1 lekë për litër. Sipas tyre, rreth 3.6 lekë vijnë nga tarifa për financimin e stokut dhe 2.5 lekë nga kostot e magazinimit, sigurisë dhe mirëmbajtjes.

Projektligji, i miratuar nga qeveria dhe i dërguar në Kuvend, parashikon ndërtimin brenda pesë vitesh të një rezerve prej 238 mijë tonësh naftë bruto dhe nënproduktesh, sa rreth 90 ditë import. Çdo vit do të blihen 43 deri 49 mijë tonë. Kostoja vjetore vlerësohet rreth 40 milionë euro, rreth 200 milionë euro për gjithë periudhën.

Tarifa fillestare supozohet 3 lekë për litër dhe do të përcaktohet çdo vit me vendim qeverie. Relacioni i projektligjit e pranon se ajo do të reflektohet në çmimin për konsumatorin.

Operatorët e quajnë tarifën një taksë të fshehtë, të vendosur pa konsultim. Opozita ka propozuar me amendament që kostoja të mbulohet nga buxheti i shtetit. Sipas tregtarëve, taksat përbëjnë sot rreth 53% të çmimit të naftës, ose 90 deri 100 lekë për litër.