Studioja daneze BIG fiton konkursin për kullën e re te Parku Rinia

Studioja daneze e arkitekturës Bjarke Ingels Group (BIG) është shpallur fituese e konkursit ndërkombëtar për ndërtesën e re në Parkun Rinia, në qendër të Tiranës. Projekti njihet me emrin “Tirana Fountain Plaza”.

Godina e re do të zëvendësojë ndërtesën aktuale të kompleksit “Tajvani”, që është pronë private. Sipas projektit fitues, vëllimet e ndërtesës ngrihen mbi nivelin e tokës, në mënyrë që hapësira e parkut poshtë tyre të mbetet e lirë dhe e aksesueshme për publikun.

Në garë u paraqitën pesë projekte ndërkombëtare para një jurie po ndërkombëtare. Kryeministri Edi Rama tha se plani do ta transformojë Parkun Rinia pa e prekur gjelbërimin e tij dhe e mbrojti zgjedhjen e arkitektëve të huaj.

Projekti ka nxitur debat publik për ndërtimet në zonat e gjelbra të kryeqytetit. Qeveria thotë se në këtë vend nuk do të bëhet asgjë që nuk lejohet në qytetet evropiane.