Faturat e vonuara të dritave: 4.5 milionë euro kamatëvonesa në gjashtë muaj

Familjet dhe bizneset që e paguan energjinë elektrike me vonesë kanë derdhur gjatë gjysmës së parë të vitit rreth 449.5 milionë lekë kamatëvonesa, afërsisht 4.5 milionë euro. Penaliteti u aplikua mbi rreth 2.21 milionë fatura të shlyera jashtë afatit.

Shuma mujore ka lëvizur mes 63 dhe 83 milionë lekëve. Shkurti ishte muaji me penalitetet më të ulëta, rreth 62.9 milionë lekë, ndërsa maji shënoi kulmin me rreth 82.9 milionë lekë. Për nga numri i faturave, qershori kryeson me mbi 410 mijë fatura të vonuara, ndërsa shkurti ka më pak, rreth 312 mijë.

Në rrjet janë regjistruar rreth 1.38 milionë konsumatorë. Fatura e një muaji mund të paguhet pa penalitet deri në fund të muajit pasardhës; pas kësaj date llogaritet kamatëvonesa.

OSHEE vijon të menaxhojë borxhet e vjetra të klientëve që kanë nënshkruar marrëveshje shlyerjeje me këste. Për këtë vit, shoqëria ka ofruar edhe skema lehtësuese, me ulje të kamatëvonesave sipas kategorisë së konsumatorit.